A Sohdeydan Qulnaqla Gceyşi Bu Ağuno di Hirutho d’Bethnahrin

 

Xıd Mawtbo Umthoyo d’Bethnahrin (MUB) naqlahreto bi vesile du duxrono du yowmo da Sohde 10 bu yarho da 10, kmathkırina bı iqoro a sohde du ağuneydan di hirutho u du cameydan kulle. Kul maşıqlo bgawed du maktabzabno laşan ihirutho u la timoyotho du cameydan u du athreydan Bethnahrin (Mezopotamya) ba casralfowat gabore nafili sohde. Mumkunyo dmathkırina a sohdeydan a gabore inaqla dxılqina athro hiro u dmitahwe ağuno umthoyo me kul xasra. MUB mu zabno dımşarele lu ağuneyde mathbatle bu fıcıleyde ancah ba badale dıgmitahwe kibe mınfıq moro la sohde dıqtili barbıroyo ba qatle dsim u bu Sayfo.

 

Bgawıd da ışne dfayıt lowğul du athro u larwal du athro u ağuno dhiw b’nişo laşan dımimıd u zedqo u huquq du cameydan nafili 39 hawrone mdidhan sohde. Bu qrobo dıkmitahwe mqabıl du tukoso barbıroyo DACIŞ mıdafıc cali haysiye u calu athro u cali hiyoyutho du cameydan. Bu qrobo du defoco du mrodo ğalabe ma m’harboneydan ba çephat matın li sohdutho. İ mıcne i ulsoyutho dkıtlın a sohde bu ağuneydan cam dkıtyo ğalabe rabtho, kaylo mbaynone di fedekariyeyo. A sohde bu ağuneydan bi sıfa cayoşene qulnaqla kıte dowro di rişutho. Mawxa, a sohde kıtlın u darğo qamoyo du ağuno di hirutho du cameydan, cal dhıne’ne dıkmahwilan a nişe şarire wu hıne’ne u bahro du darbeydan. Hıne’ne u nubco du moral di haymonutho da haye dkıtne b’iqoro ubı çasara.

 

U ağuneydan mqabıl di dhulmiye darqıblo maktabzabnoyoyo u ışmeyde masirutho ba sohdeyo. A sohdeydan bu geşmo valav kmıfroşi mbeynotheyna bas macnaviyan qulnaqla kıbalan haylo. U hawro Abgar hawi u sohdo qamoyo 10 bu yarho da 10 di şato dan 1999 ba turone da Zagroze, bıthır b’Qandil-a Cudiye, b’Musul Ninwe pu faho xayin dnafili sohde-a Luaye u Zuhey’rat, b’Urifi Matay Rabowiye, bu Xabur-Athro u Akkad, ubi Tabqa-a Haniye wa Kristiyane, bi Qamışlo, b’Raqaa uba dukothe hrene du ağuno, mıştawtaflın lu karwan da sohde du ağuno di hirutho.

 

Bu makthabzabno dıkthulın a sohde bu admathe, u cameydan naqla hreto mşarele dhowe zawco di hirutho beynothe, a zayne da sohde lo fayişi cali arco, elo mşatıs u Mawtbo Folhoyo Suryoyo-MFS, u Sutoro, a Haylawotho du sutoro da Neşe d’Bethnahrin-HSNB wa Haylawotho di Daşto d’Ninwe-NPF dkımdawmi u ağuno di hirutho li zoxutho. B’Suriya, i federaliye du garbyo d’Suriya hawyo i falsafe mşawtafto da haye da came camhıdode, bu şıkılano a hulme da sohde du cameydan u Othuroyo Oromoyo Kaldoyo Suryoyo dkıtyo i hirutho, kınuhto la haye. Ba rbohe dhawile u cameydan ba falqe d’Bethnahrin, ktıcle u kafan du mawto dımdhewolın a hayle hakome calu cameydan.

 

A şuşote dıkowun bu Cıraq kıtore u statü du cameydan dhowe bu yowmoyo u bcayni zabno d’mihalıq dawsatste laşan dmitabıq. U cameydan athi lu yowmoyo dı britho cal demtakes u dhule ağuno b’fusqono kamilo larwal u lowğul du athro.

 

A sohde mthabatlın du cameydan hawile sabro u haymonutho dı qodır dımdafıc cala timoyotho dkıtle ba falqe du athro u dımbayın u dactith d’ruhe bı hirutho cama came hrene dıkhoyın bu athro d’Bethnahrin. Aşuşotani kulle bi vesille da sohdeydan u birişutho dsıme lu ağuno di hirıtho hawın. Adyoma dıkminaqış lu cameydan federasyon, kanton u cam ğer came mdabronutho meştawtafto u xıdani statüye meqım kımmo ışne mıhzanwo subwotho dleybın dhowanwo.

 

U ağuneydan bıthır mıd mati lu darğano wolitho ulseyto u rabthoyo a şutose, tukose a falqe u şahsat du cameydan kulle dmamtın i vasiye da sohde li duktho. İqreyto da sohdeydan qulnaqla hawyo qreyto lu camo dnofuq moro lu ağuneyde u şariro. U temthil di irade siyasi u umtheyto, yulfono bu leşono emhoyo u laşan azedqeydan ahrene dmotenalın kılozım demdafcina u demşavşıtina a sahat di hirutho. Mowxaste u gayso da sohde gımdawım mharıb hol dmandıf ahayle catume me Bethnahrin. Kılozım u cameydan dsonıd u demcadır uqrobano me kul xasra. Laşan me hatho dmıbne u dmıxlıq cyeşe b’nasihutho bu Daşto d’Ninve u bi Gozarto kılozım u cameydan dhowele strateji li mawçudiyeyde i şırşeyto u lu dactitheyde.

 

Bi rişutho du ağuneydan hawi sohde me came hrene laşan i hirutho du athreydan Bethnahrin. A sohdeydan maqwelın a esore dbeyn da came, u hıne’ne u hfuxyo dımqabıl di dhılmiye u a Spartaküs’e mşawşıte danışmonathe wa hayathe gıdmıkthowi bu makthabzabno d’calu cafro d’Bethnahrin. Kılozım u ray dıbritho u cameydan doduc u ağuno dıkbena ağuno di noşuthoyo. Liyan a grube a mdabronwotho maşılmone qaşye, tuxmonoye, otokratikoye, oligarşikoye kımçarbi kul darbo laşan dlohun u camo Suryoyo-Othuroyo-Kaldoyo-Orumoyo mu athreyde. Mqabıl di barbıroyuthathe i çapha dıxlıqe a came i noşutho kyurwo bu madenho mescoyo, DACIŞ a sanodeyde kmığlobi ma mharbone gabore. İ zoxutho bi hareyto gıdhuyo la came dkobın qrobo laşan i hiruthathe. Kılozım u cameydan dmetyaqın dgımhalxina bu darbo da sohdeydan u bi hareytoste dıgqımrina.

 

Ahna u Mawtbo Umthoyo d’Bethnahrin MUB, naqla hreto kıkayfina rişayna qum da sohdeydan u ksaymina qroyto la şutose du Mawtbeydan bi qamayto ulu cameydan kule, dsoyım hfitwotho bu duxrono da sohde dkıtyo 10 bu yarhano d’Teşrin u qamoyo. Naqlahreto kıbena abuyoeydan la eqrotho da sohdeydan u la qariwathe lu cameydan kulle u kımminalın rişho basimo.

 

 

 

A sohdeydan u garanti du ağuno di hiruthone

 

A sohde cayoşene

 

Tihe lu ağuno umthoyo di hirutho dıkmitahwe bi rişutho da sohde

 

 

Sictho Rişutho (MUB)

06.10.2017